RAMADAN  AVDIU

Zëvendësministër i Ministrisë së Financave

Ramadan Avdiu, u emërua  zëvendësministër i Ministrisë së Financave të Republikës së Kosovës më 23 maj 2011.

Para se të emërohej zëvendësministër i Financave,z. Avdiu ishte deputet në Kuvendin e Republikës së Kosovës për një mandat. Nga viti 1999- 2000, ishte  sekretar i përgjithshëm në Qeverinë e Përkohshme të Kosovës, nga 2000 - 2002 ishte anëtarë i Sekretariatit të Këshillit të Përkohshëm Administrativ dhe Këshillit Transitor  të Kosovës, nga 2000-2002  ishte këshilltarë në Asamblenë Komunale në Prishtinë dhe gjithashtu nga viti 2002-2004 ishte këshilltarë i lartë politik i Kryeministrit të Republikës së Kosovës.

Z. Avdiu  gjithashtu ka një karrierë të shquar politike, brenda dhe jashtë Kosovës, u burgos nga ish-regjimi serb  ku vuajti dënimin nga viti 1984 deri 1989, për aktivitetet e tij politike si anëtar i Lëvizjes së fshehtë antipushtuese. Pas daljes nga burgu u inkuadrua në Lëvizjen Popullore të Kosovës (LPK), ku ishte një ndër udhëheqësit kryesore të asaj lëvizje në Kosovë deri  në vitin 1993, gjithashtu  ishte edhe kryetar i nëndegës  së LPK- së në Zvicër.

Gjatë veprimtarisë së tij në Zvicër , z. Avdiu ishte edhe redaktor i gazetës “Zëri i Kosovës”. Gjatë periudhës së luftës çlirimtare,  ishte anëtarë i Grupit Politik të Ushtrisë Çlirimtare të Kosovës (UÇK) për marrëdhënie me jashtë.

Është anëtarë i Kryesisë së Partisë Demokratike të Kosovës që nga themelimi i saj me 1999.

Ramadan Avdiu  diplomoi në  Universitetin e Prishtinës, në Fakultetin Ekonomik, ndërsa  në Universitetin e Lozanës në Zvicër diplomoi  në degën e  Shkencave Politike. Magjistroi  për marrëdhënie ndërkombëtare në Qendrën për Studime Diplomatike dhe Strategjike në  Paris.

Flet gjuhën angleze, frënge dhe serbokroate .

Në funksionin e tij si zëvendësministër i Financave  bënë hartimin e politikave financiare dhe çështjeve buxhetore në Kosovë.

Zëvendësministri Ramadan Avdiu  është i lindur më 24 janar 1964 në Prishtinë.

Jeton në Prishtinë  me bashkëshorten e tij znj. Buqe Dajaku-Avdiu dhe kanë tre fëmijë: Shpresën, Njomzën dhe Linën.