(Prishtinë –  08 shtator  2010)

Republika e Kosovës  pranon pjesën e parë të ndihmës direkte buxhetore prej  30 milion Eurosh nga Komisioni Evropian

Ministri i Ekonomisë dhe Financave, Ahmet Shala së bashku me përfaqësuesin e Zyrës Ndërlidhëse të Komisionit Evropian, Kjartan Björnsson, në konferencë për media kanë njoftuar  se Republika e Kosovës tashmë ka pranuar pjesën e parë të ndihmës direkte buxhetore nga Komisioni Evropian, në vlerë prej 30 milion Eurosh.

Ministri i Ekonomisë dhe Financave, Ahmet Shala tha se “ Kjo mbështetje jo vetëm se e pasuron buxhetin e Republikës së Kosovës duke mundësuar zhvillimin e projekteve të shumta publike, por edhe kurorëzon punën e arritur në zhvillimin e reformave më se të nevojshme të menaxhimit publik si dhe afirmon aplikimin e politikave të mirëfillta ekonomike të ndërmarra nga ana e Qeverisë së Kosovës. Të gjitha këto veprime përfundimisht kanë çuar në plotësimin e kushteve të parashtruara nga Komisioni Evropian për fillimin e dhënies së mbështetjes financiare në vlerë prej 150 milion euro, të premtuar në Konferencën e Donatorëve”.

Ai më tej shtoi se “Është edhe më inkurajues fakti se kjo mbështetje vjen pas disbursimit të transhit të parë të përkrahjes nga FMN-ja, duke ngritur mbështetjen e pranuar në periudhën Qershor-Shtator 2010 në 52 milion Euro. Kjo shumë pritet të dyfishohet nga fundi i këtij viti, pas takimeve të ardhshme me FMN-në dhe Komisionin Evropian në Tetor”.

Ndërsa, përfaqësuesi  i Zyrës Ndërlidhëse të Komisionit Evropian, Kjartan Björnsson, tha se “ Ju informoj që me datën 2 shtator 2010 komisioni evropian ka bwrw transferimin e shumës prej 30 milion euro për Kosovën. Kjo shumë është pjesa e parë e grantit prej 50 milionëve e premtuar nga Unioni Evropian si mbështetje makro financiare e cila është aprovuar nga Unioni Evropian. Kjo është një mbështetje direkte buxhetore dhe këto mjete si të tilla janë transferuar në llogarinë e qeverisë tek |Banka Qendrore e Kosovës”.

Ai gjithashtu shtoi se “Kjo asistence vjen pasi që Kosova ka përmbushur të gjitha kriteret e përcaktuar për këtë disbursim. Marrëveshja e fundit me FMN, e cila është arritur pas një kohe të gjatë të negociatave të zhvilluara. Ky program i nënshkruar me FMN-në do të kontribuoj në ruajtjen e qëndrueshmërisë së Financave publike në Kosovë. Është me rëndësi për Kosovën që të ndërmarr të gjitha masat për të siguruar implementim të plotë të kësaj marrëveshje”.

Marrja e mbështetjes në formë të ndihmës direkte buxhetore dëshmon  se Institucionet ndërkombëtare i vlerësojnë kapacitetet planifikuese të Qeverisë së Kosovës, dhe besojnë se Korniza jonë fiskale mund të gjenerojë zhvillimin e nevojshëm ekonomik.

Një nga kushtet themelore të Komisionit Evropian për dhënien e mbështetjes financiare në formë të përkrahjes direkte buxhetore ka qenë përpilimi i dokumenteve planifikuese tre-vjeçare, dhe i një pakoje të besueshme fiskale. Në bazë të prioriteteve të paracaktuara të Qeverisë së Kosovës, ne kemi arritur të prezantojmë një plan të qëndrueshëm fiskal, pjesë e të cilit janë projektet kapitale dhe iniciativat e shumta ligjore.